କୋଭିଡ ଭାକ୍ସିନ ଗୁରୁବାର ଠାରୁ ଦିଆଯିବା କୁ ଥିବା ଯୋଗୁଁ କୋରାପୁଟ ଜିଲ୍ଲାସ୍ତରରେ ଭାକ୍ସିନକୁ ଲୋକଙ୍କ ପାଖରେ ପହଞ୍ଚାଇବା ପାଇଁ ଯୋଜନା ପ୍ରସ୍ତୁତି ଆରମ୍ଭ ହୋଇଯାଇଛି ବୋଲି ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଅରୁଣ ପାଢ଼ୀ ଜଣାଇଛନ୍ତି । ଗତ କିଛି ଦିନ ମଧ୍ୟରେ ଓଡିଶା ରେ ପ୍ରତି ଦିନ ଦୁଇ ଚାରୋଟି କୋଭିଡ ସଂକ୍ରମଣ ଦେଖାଯାଉଥିବା ବେଳେ କୋରାପୁଟ ଜିଲ୍ଲା ରେ ପନ୍ଦର କୋଡିଏ ଦିନରେ ଗୋଟିଏ ଦୁଇଟି ରୋଗୀ ଚିହ୍ନଟ ହେଉଛନ୍ତି । ବିଦେଶୀ ରାଷ୍ଟ୍ର ଭଳି ଆମ ଅଂଚଳରେ ସ୍ଥିତି ଗମ୍ଭୀର ନଥିଲେ ବି ଟୀକାକରଣ ର ସଫଳ ରୋଗ ପ୍ରତିରୋଧକ ଶକ୍ତି କୁ ଲକ୍ଷ ରଖି ଓଡିଶାରେ ଟୀକାକରଣ ପାଇଁ ଏହି ପର୍ଯ୍ୟାୟ ଆରମ୍ଭ କରାଯାଇଥିବା ଡାକ୍ତର ପାଢ଼ୀ ଜଣାଇଛନ୍ତି । ପୂର୍ବ ପର୍ଯ୍ୟାୟ ରେ ଜିଲ୍ଲାର 12-18 ବର୍ଷ ବୟସର ଶତ ପ୍ରତିଶତ ପିଲା ଙ୍କ ଟୀକାକରଣ ସରିଥିଲା ବେଳେ 18-60 ବର୍ଷର ଲୋକଙ୍କ ମଧ୍ୟରୁ ଶତକଡା 80 ଭାଗ ଲୋକେ ପ୍ରଥମ ଡୋଜ ନେଇସାରିଥିବା ସେ ଜଣାଇଛନ୍ତି ।ବର୍ତମାନ ପର୍ଯ୍ୟାୟରେ 35 ହଜାର ଟୀକା କୋରାପୁଟ ଜିଲ୍ଲାକୁ ପହଁଚିଥିବା ବେଳେ ଏହା ଜିଲ୍ଲାର ପ୍ରତି ବ୍ଲକ ସଦର ମହକୁମାରେ ଥିବା ଚିକିତ୍ସାଳୟରେ , ଜୟପୁର ସ୍ଥିତ ଜିଲ୍ଲା ମୁଖ୍ୟ ଚିକିତ୍ସାଳୟ ଓ କୋରାପୁଟ ସ୍ଥିତ ମେଡିକାଲ କଲେଜ ହସ୍ପିଟାଲରେ ଦ୍ଵିତୀୟ ଡୋଜ ଓ ବୁସ୍ଟର ଡୋଜ ଭାବେ ଦିଆଯିବ ବୋଲି ଡାକ୍ତର ପାଢ଼ୀ ଜଣାଇଛନ୍ତି । ତେବେ ଯେଉଁମାନେ ଵର୍ତମାନ ପର୍ଯ୍ୟନ୍ତ ପ୍ରଥମ ଡୋଜ ଟୀକା ନେଇ ନାହାନ୍ତି ସେମାନେ ବେସରକାରୀ ହସ୍ପିଟାଲରେ ଟୀକା କିଣି ନେଇପାରିବେ ବୋଲି ସେ ସ୍ପଷ୍ଟ କରିଛନ୍ତି ।
